FENDAS E FERRALLA: Nova via en Peña Rueba: Macondo

Equipamos esta vía antes das calores horribilis deste verán abrasador, outras obrigas, e algo de nugalla, fixeron que non nos coincidise irlle dar uns pegues e saneala un pouco ata o outono, mais aquí está preparada para que lle vaiades dar unhas apretadas, espero que vos goste e que a gocedes. A vía é moi interesante porque ten de todo, comeza por un diedro precioso, cruza o teito polo débil pero pedaleando, ten panzas apretonas e muros de continuidade alucinantes; a rocha é bastante boa en xeral, con algunhas seccións mediocres, mais iso é o costume da rocha do lugar mentres non pasen cordadas abondo para que se vaia saneando.

No canto esquerdo do Mallo la Calva, o pano de rocha entre a Make e a Terrazas herbosas é o noso obxectivo, para meternos na vía faremos uso do diedro de Pantano No (I. Cinto) e do teito de Vacio existencial (Ch. Agustín e M. Carasol), dúas boas vías de corte deportivo que agora teñen unha maior relación. O grao que nós vimos é 7a/Ae, con algunhas panzas en A0 que se poderían liberar mais estando realmente fortes e motivados, grao ogrigado arredor do 6b; para repetila cómpre levar 16 cintas (algunha longa pode vir ben) e estribos (dous mellor ca un). O descenso pola vía só con dobre corda, cunha corda de 70m o descenso máis próximo é o de Aliana, e a opción máis segura pola ferrata. Queremos agradecerlle a Manolo e David que viñeran probar a vía e testar algúns cantos, a seguir fago unha descrición por longos para que teñades info fresca de cada un:

L1.- 6b/A0, preciosa escalada en diedro pola vía Pantano No, a nosa reunión está como 5m por riba na comodidade dunha repisa, onde remata o diedro. A sección de A0 –previa á R1- foi liberada atacando primeiro pola dereita da reunión de Pantano No e logo volvendo ao diedro, sae unha sección a bloque como de 7a para quen queira probala. Rocha moi boa

L2.- Ae/6b, saimos en libre cara a esquerda e enlazamos co teito de Vacio existencial que pasaremos pedaleando (en libre din que 8a) , ao saír do teito deixamos á dereita a reunión desta vía e continuamos por uns metros de 6b ata a nosa R2 supercómoda. Rocha mediocre ao saír do teito

L3.- 6c/A0, bonito longo que comeza en diagonal esquerda e supera unha panza en A0, continúa por unha escalada bonita e xenerosa en cantos ata outra panza-diedro que se supera pola esquerda. Rocha boa en conxunto.

L4.- 6b+/A0, volvemos saír en diagonal esquerda superando varias panzas que se negocian ben, aínda que aparentan máis carácter, afrontamos logo un muro bastante vertical, con rocha dubidosa, que nos leva á panza final que superamos, inicialmente, en A0. Rocha mediocre en conxunto.

L5.- 7a, excepcional muro de continuidade con boa rocha en xeral. Longo precioso.

L6.- 6b, superamos a panza que temos sobre nós (paso a bloque de 6b) e, por riba, enlazamos coas chapas de saída da Terrazas herbosas (IV). Rocha boa.